«Жаңа өмір, жаңа жыл, жаңа күнмен көрісу»
14.03.2025
Қараағаш ауылдық үлгілі кітапханасында 14 наурыз күні «Жаңа өмір, жаңа жыл, жаңа күнмен көрісу» атты бейнеролик көрсетілді. Наурыз мейрамына арналған бұл шара Көрісу – Амал мерекесі аясында өтті. Қараағаш ауылының мекемелерін аралап, амандасып, қауышып, қыстан аман-есен шығу мерекесімен құттықтадық. 14 наурыз – Көрісу мейрамы. Бұл күні халық қыстан аман-есен шыққанына қуанып, бір-бірімен қол алысады. Әр адам түске дейін үш үйдің есігін ашып, көрісіп үлгеруі керек. Бұл дәстүр – жыл бойы балаларымыз тоқ жүрсін, дастарханымыз мол болсын, қарым-қатынасымызға сызат түспесін деген ниеттен туған. Осы орайда әкімшілік қызметкерлері, аурухана дәрігерлері және мәдениет үйінің қызметкерлері арасында амандасу, көрісу амалдары жасалды. Жарқыраған көктемнің ашық аспанында 14 наурыз – Көрісу (Амал) мерекесі құтты болсын! Жылдан жылға аман-есен жете берейік деген шынайы тілектер айтылып, қуанышпен қауышқан күн болды. Мақсаты: Көрісу дәстүрі туралы түсінік беру, қазақ халқының салт-дәстүрлерінің бірі – Амал мерекесінің ерекшелігімен таныстыру және үлкенге құрмет, кішіге ізет көрсетуге баулу.
