«Жұлдызды сәт» атты әдеби балл

      9 желтоқсан күні Б.Өтешов атындағы үлгілі балалар кітапханасы   «Балалар жылы» аясында С.Сейфуллин атындағы орталық кітапханасында «Жұлдызды сәт» атты әдеби балл ұйымдастырды. «Балалар жылының» қорытындысы ретінде өткен  әдеби балдың салтанатты ашылуы концерттік бағдарламаға ұласты. Мерекелік кеш «Ақерке» балабақшасы бүлдіршіндерінің мың бұралған биімен басталып, кішкентай әнші жұлдыз Әдия Молдабаеваның «Ертегілер» әнімен жалғасты. Мерекелік кешті  қазақ кино әлемінде аты аңызға айналған Шәкен Аймановтың «Тақиялы періште» комедиясында  алғаш орындалған «Ана» әнімен Бидайық ауылдық кітапханасының кітапханашысы Нұргүл Ақшолақова тамылжыта орындады.  Алаңсыз балалық шаққа саяхат жасатқан  Ералиев ауылдық кітапханасы ұжымы дайындаған «Айна» атты көрінісі көрермен көңілінен шықты. Ұлыбританиялық жазушы Жоан Роулиң жазған қиял-ғажайып шығармалар жинағы Гарри Поттердің кітап желісі бойынша  «Гарри Поттер және сиқыршылар әлемі» атты Байдалы би ауылдық кітапханашыларының ұйымдастыруымен сиқыр өнері көрсетіліп, келген қонақтарды таң-тамаша етті. «Балалар жылы» аясында ұйымдастырылып,  соңың ішінде «Балалар әдебиетіне» арналған  іс-шарада қатысушылар, әдеби балдың ережесіне сай,  өзінің сүйікті кейіпкерін бейнесінде келіп, ертегі кейіпкерлерінің шеруіне қатысты. «Әдеби дефиле» соңында үздік образдағы кейіпкерлер марапатталып, сыйлықтар табыс етілді. А.Сейдібек ЖББМ даярлық тобының оқушылары флешмоб биін билеп, кештің әрін кіргізді.  «Жұлдызды сәт» атты әдеби балға Жаңаарқа аудандық Мәслихат хатшысы Өмірзақ Бекмұратұлы мен  Жаңаарқа аудандық «Аманат» партиясы демеушілік еттіп қолдау көрсетті.                                                                   Меркелік кештің екінші бөлімі кітапхананың «Коворкинг» орталығында жалғасты Б.Өтешов атындағы үлгілі балалар кітапханасы   мен ауданға қарасты ауылдық балалар кітапханасы 8 алаңнан тұратын әр сала бойынша жәрмеңке ұйымдастырды. Келген қатысушылар мен қонақтарды аниматорлар күтіп алып үнпарақтар таратып, алаңдарға бөліп тұрды. 
Қарағаш ауылдық кітапханасы «ЭКОБУМ» облыстық жобасы ұсынған акция бойынша  оқушылар табиғатқа зиянды қалдықтарды яғни, бөтелке қақпақтары мен қағаз қиындыларын жинап, оларды пайдалы мақсатқа қолдану жолдарын көрсетті. Ең көп бөтелке қақпақтары мен қағаз қиындыларын (макулатура) тапсырған қатысушыларға сыйлықтар табыс етілді. «Өзіңмен бірге ал кет!»  атты кітап көрмесі құрылып, келген қонақтар  ұнаған кітаптарын оқуға алды. Қызылжар ауылдық кітапханасы ұйымдастырған «Тапқыр болсаң, тауып көр» алаңында оқушыларға қазақ әдебиетінің маңдай алды шығармалары мен қарымды қаламгерлер жайлы қызықты сұрақтар қойылды. «Кітапханалық казино» ойынына да оқушылар белсене ат салысты. Орынбай ауылдық кітапханасы дайындап әкелген кітапханалық казинода  ақ білектің күшімен, ақ найзаның ұшымен қорғап қалған ұлан-ғайыр атыраптың өткені мен кеткеніне көз жүгіртетін қазақтың салт-дәстүрлері мен өнегелі өмірі жайлы сұрақтар қойылды. Ақтүбек ауылдық кітапханасы дайындаған  «Ностальгия кітаптар» алаңында бәрімізге кеңінен таныс мультфильмдердің әуені қойылып, сол ертегіге байланысты сұрақтар берілді. Қатысушылар шетел және қазақ әдебиеті ертегілерінің кейіпкерлері жайлы қойылған сұрақтарға мүдірмей жауап беріп, белсенділік танытты.  «Айболит» ертегісінің желісі бойынша дайындалған С.Сейфуллин ауылдық кітапханасы қызметкерлері  дәрігер кейіпінде «Дәріхана» алаңын ұйымдастырды. Алдымен оқушылардың дене қызуымен  кеудесі тексеріліп ойынға дайындықтары пысықталып өтті. Алаңда оқушылар адам ағзасы мен зиянды заттар жайлы қызықты ойындар ойнатылып, дене қозғалысы мен жаттығулардың пайдасы жайлы ақпарат берілді. Әр алаңда белсене ат салысқан оқушыларға «Балалар жылы» эмблемасы бар жетондар беріліп отырды. Осы жетондарды «Библиобанкте» ақшаға аударып, «Бибилобистродан» тегін тамақ ішті. Кеш соңында  іс-шараға белсене ат салысқан қатысушылар мен алаңдарда үздік ойын көрсеткен оқушыларға алғыс хаттары мен сыйлықтар табыс етілді.