Борсынбаева Орынтай
Орынтай Ахметжанқызы Борсынбаева 1932 жылдың 20 наурызында Қазақ КСР-і, қазіргі Қазақстан аумағындағы Өркендеу колхозында дүниеге келген. Әкесі — Ахметжан Ыбыраев.
1941 жылы Ұлы Отан соғысы басталғанда әкесі майданға аттанып, 1943 жылы оң қолынан жараланып елге оралған. Соғыстың ауыртпалығы мен ер азаматтардың жетіспеушілігіне байланысты Орынтай Ахметжанқызы небәрі 4-сыныпты аяқтаған соң еңбекке араласуға мәжбүр болды. Жас кезінен бастап ауыл шаруашылығында адал еңбек етті: бидай шапты, қол арамен жұмыс істеді, әскердегі жауынгерлерге жүннен биалай (қолғап) тоқыды.
Соғыс кезіндегі қажырлы еңбегі үшін тыл ардагері атанды.
1951 жылы Орынтай Ахметжанқызы Борсынбаев Ошақ есімді азаматқа тұрмысқа шықты. Ошақ Борсынбаев — 43 жыл бойы мал дәрігері болып қызмет еткен, ел құрметіне ие болған жан. Ол 88 жасында дүниеден өтті.
Орынтай Ахметжанқызы — 13 баланың анасы, көп балалы ана ретінде «Алтын алқа» мемлекеттік наградасымен марапатталған.
Мемлекет пен жергілікті билік оның өмірлік жолын жоғары бағалады:
• Қазақстан Республикасы Президентінің 2015 жылғы 19 қаңтардағы №992 Жарлығы бойынша «1941–1945 жылдардағы Ұлы Отан соғысындағы Жеңістің 70 жылдығы» мерекелік медалімен марапатталды.
• Қазақстан Республикасы Президентінің 2025 жылғы 28 сәуірдегі Жарлығы бойынша «Ұлы Отан соғысындағы Жеңіске 80 жыл» мерекелік медалімен наградталды.
• Сонымен қатар, аудан әкімінің Құрмет грамоталары мен Алғыс хаттарына ие болды.
Орынтай Ахметжанқызының өмір жолы — маңдай термен келген еңбек, отаншылдық, аналық мейірім мен ұрпақ тәрбиесіне арналған ғибратты ғұмырдың жарқын үлгісі.
